Radio Golden Live..

जसले एक दशकसम्म मानसिक यातना खेपे

काठमाण्डौँ, ४ वैशाख । चेनअफ कमाण्डमा चलेको नेपाली सेनाका एक जना अधिकृतले माओवादीले चलाएको शसस्त्र द्वन्दका समयमा एक दशकसम्म मानसिक यातना खेपे । संगठनभित्रका धेरै अवसरहरु समेत गुमाए । अन्यायमा परेका सेनाका कर्णेल निरञ्जन बस्नेतले आइतबार काभ्रे जिल्ला अदालतबाट बल्ल सफाइ पाएका छन् ।

काभ्रेपलाञ्चोकको खरेलथोकस्थित भगवती माध्यमिक विद्यालयको ९ कक्षामा अध्ययनरत १५ वर्षीया मैना सुनुवारको नेपाली सेनाको ब्यारेकभित्र २०६० फागुन ५ गते मृत्यु भएको थियो । सशस्त्र द्वन्द्वकालमा भएको सो घटनाको मुद्दाको जिल्ला अदालत, काभ्रेपलाञ्चोकका न्यायाधीश मोदिनीप्रसाद पौड्यालको इजलासले आइतबार फैसला सुनाएको हो ।

तत्कालीन शाही नेपाली सेनाका महासेनानी बबी खत्री, सहसेनानीद्वय अमित पुन र सुनिल अधिकारीलाई मुलुकी ऐन ज्यानसम्बन्धी महलको १३ (३) बमोजिम जन्मकैदको फैसला सुनाएको छ । चालक रहेका तत्कालीन सेनानी बस्नेतलाई भने आदेशमात्रै पालन गरेको भन्दै अदालतले सफाइ दिएको छ ।

महासेनानी खत्री, सहसेनानीद्वय पुन र अधिकारी तथा सेनानी बस्नेतलाई विपक्षी बनाई विसं २०६४ माघ ७ गते अभियोग दर्ता भएको थियो । सैनिक अदालतले यसअघि नै बस्नेतलाई निर्दोष भन्दै सफाइ दिइसकको थियो । तर विभिन्न गैरसरकारी संघ÷संस्थाले बस्नेतलाई अनावश्यक रुपमा कारबाहीको माग गर्दै दबाब दिँदै आएका थिए ।

नेपाली सेना भित्र सक्षम, इमान्दार, कर्तव्यनिष्ठ सैनिक अधिकृतका रुपमा चिनिएका बस्नेत घटनाका बेला सह सेनानी थिए । घटनाकै कारण देखाउँदै सन् २००८ मा बस्नेतलाई शान्तिमिसनबाट समेत अपहेलित गर्दै स्वदेश फिर्ता गराइएको थियो । एक दशकसम्म सेनामा हुने विभिन्न प्रकारका विदेशी कोर्स, बढुवा र अन्य सुविधाबाट बस्नेत बञ्चित रहेका थिए ।

प्रधानन्यायाधिश सुशीला कार्कीले नेतृत्व गरेको स्वतन्त्र न्यायालयबाट सैनिक अधिकृत बस्नेतले सही न्याय पाएका छन् । निर्दोषलाई फसाउन दिन हुन्न भन्ने संगठन प्रमुखको मुल्याङ्कन बस्नेतमाथिको घटनाले देखिएको छ । घटनामा अनाश्यक मुछिएपछि बस्नेत परिवारले यसबीचमा अनेकन यातना खप्नु परेको थियो ।

पुरै परिवार मानसिक यातनाको शिकार बनेपनि बस्नेत कर्तव्य पालनाका हकमा भने कहिल्यै पछि हटेनन् । ‘कर्मठ सिपाहीले आदेश पालना गर्नु दोष मानिदैन’ एक सैनिक अधिकृतले भने–‘बस्नेतलाई गैर सरकारी संस्थाहरुकै दबाबमा लामो समय मानसिक यातना दिइयो ।’

© २०१६, सर्वाधिकार गोल्डेनखबर डट कममा सुरक्षित फोन नं: ०१-५१७२६५७इमेल: [email protected]