Radio Golden Live..

जेठ महिनामा चलचित्रको लर्को

काठमाडौं– स्थानीय निर्वाचन, बलिउडको बहुप्रतिक्षित चलचित्र ‘बाहुबली’को प्रभाव लगायतका बिभिन्न कारणले गत बैशाख महिनामा नेपाली चलचित्र प्रदर्शनमा नआएपछि जेठ महिनामा रिलिजको लागि चलचित्रहरुको लर्को लागेको छ ।
जेठको पहिलो साता देखि अन्तिम साता ताती नै लाग्ने भएको छ । जेठको पहिलो साता शुक्रबार अर्थात ५ जेठमा छुल्ठिम गुरुङको ‘डायरी’ प्रदर्शनमा आउँदैछ । सेन्सरबोर्डबाट पिजी अर्थात् १६ बर्ष भन्दा मुनिका बालबालिकाले हेर्न नमिल्ने प्रमाण पत्र पाएको अनिल योञ्जन निर्दे्शित ‘डायरी’ रेखा थापा, छुल्ठिन लगायतको अभिनय रहेको छ ।
त्यस्तै जेठको दोस्रो साता अर्थात १२ गते एकसाथ दुई चलचित्र ‘पर्व’ र ‘हिटलर’ प्रदर्शनमा आउँदैछ । दिनेश राउतले निर्देशन गरेको ‘पर्व’ निकिता पौडेल र सुबाश गिरीले मिलेर बनाएका हुन् । चलचित्रमा नम्रता श्रेष्ठ, कोशिश क्षेत्रि, माला लिम्बु, जेस्सिका कार्की, केशव भट्टराई, प्रिया रिजाल आदि कलाकारहरुको अभिनय रहेको छ । ‘हिटलर’ सोहित मानन्धर र नव नायिका सामिया बर्तौलाको रोमान्स रहेको चलचित्र हो । सौरभ ढकालले निर्देशन गरेको चलचित्र हो ।
जेठ १९ मा पनि चलचित्र ‘जालो’ र ‘रातो घर’प्रदर्शनमा आउँदैछ । अराज केशव गिरी निर्दे्शित जालो गिनिज बुकमा विश्वकै लामो वान टेक मुभीको रेकर्ड बनाउने उद्देश्यले निर्माण गरिएको हो । चलचित्रमा निर शाह र मेनुका प्रधानसँगै अनुपविक्रम शाही, रेमन्डदास श्रेष्ठ लगायतका कलाकारले अभिनय गरेका छन् ।
सुरज सुब्बा ‘नाल्बो’ निर्दे्शित चलचित्र ‘रातो घर’ विल्सन विक्रम राई, गौरव पहारी, संयम पुरी, मेनुका प्रधान, जिेतन तामाङ लगायतका कलाकारको अभिनय रहेको चलचित्र हो । चलचित्रका निर्माता विल्सन विक्रम राई हुन् ।
अन्तिम साता २६ जेठमा पनि दुई चलचित्र लाग्दैछन् । ‘आधा लभ’ र ‘मेरी कुसुम’ । ‘आधा लभ’ अभिनेत्री ऋचा शर्माले निर्माण गरेको चलचित्र हो । वृद्धवृद्धाबीचको प्रेमकथा र युवा प्रेमलाई देखाउन खोजिएको चलचित्रमा मिथिला शर्मा, टीका पहारी, ऋचा शर्मा, रेमनदास श्रेष्ठ, रोजिशा शाही, विपीन मिकी गुरुङलगायतको अभिनय रहेको छ ।
‘मेरी कुसुम’ नवनायक मोहन बोगटी, खलनायक राजकुमार थापा तथा नायिका हर्षिका श्रेष्ठ र नवनायिका सुदिप्ता अधिकारीको मुख्य भूमिका रहेको चलचित्र हो । सुनिता शर्मा बोगटीको निर्माण तथा रविन्द्र कुवरको सह–निर्माणमा बनेको चलचित्र ‘मेरी कुसुम’ लाई एनआर घिमिरेले निर्देशन गरेका हुन् ।

© २०१६, सर्वाधिकार गोल्डेनखबर डट कममा सुरक्षित फोन नं: ०१-५१७२६५७इमेल: [email protected]