Radio Golden Live..

प्रधानमन्त्रीद्धारा दोस्रो चरणको निर्वाचन तोकिएको मितिमा हुने स्पष्ट


काठमाडौँ –स्थानीय तहको दोस्रो चरणको निर्वाचन राष्ट्रिय जनता पार्टीले भाग नलिने भनिरहेको अवस्थामा प्रधानमन्त्री पुष्पकमल दाहालले निर्धारित मितिमा नै चुनाव हुनेमा ढुक्क रहन आग्रह गरेका छन् ।
व्यवस्थापिका–संसद्को आइतबारको बैठकमा प्रधानमन्त्री दाहालले आफू र आफ्नो पार्टीलाई मात्र केन्द्रमा राखेको–हेरेको भए सबैलाई जोडेर स्थानीय तहको निर्वाचनमा जान सकिँदैन थियो भन्दै देशको आवश्यकता र संविधान कार्यान्वयनका लागि आफूले यस्तो कदम चालेको बताए ।
सरकार र नीति तथा कार्यक्रम कामचलाउ सरकारको भन पछि प्रधानमन्त्री दाहालले भने, ‘यो नीति कामचलाउ होइन र छलफल पनि काम चलाउ होइन, अझ परिमार्जन गर्न छलफल हो । यो सरकार बहुमत गुमाएको वा अविश्वास दर्ता भएको होइन न त जनताको विरोध भएर राजीनामा गरी कामचलाउ भएको हो । सबै राजनीतिक शक्तिलाई एक ठाउँमा ल्याउन गरिएको महत्वपूर्ण कदम हो ।’
उनले भने, ‘मेरो जोड स्थानीयपछि प्रदेश र संघको निर्वाचनसमेत सम्पन्न गरी सङ्क्रमणकाल अन्त्य गर्नेमा छ ।’भारतसँगको छलफलपछि हुलाकी राजमार्गको करिब ८०० किमी सडक जोडतोडका साथ निर्माण अघि बढेको जानकारी गराउँदै उनले चीनसँगका सम्झौता पनि अघि बढेका छन् भने ।
प्रतिपक्षीलाई आफूले सदैव विश्वासमा लिने क्रमलाई निरन्तरता दिँदै आएको अवगत गराउँदै प्रधानमन्त्री दाहालले भने, ‘म निरन्तर प्रतिपक्षीलगायतसँग संवादमा छु ।’ सरकारले थालेको महत्वपूर्ण अभियानअन्तर्गत विद्युत्भार कटौती अन्त्य र आर्थिक वृद्धिदर बढेको उल्लेख गरे।
परराष्ट्र नीति आवेगबाट होइन विवेकबाट हुनुपर्छ भन्ने कुरा आफूले व्यवहारमा कार्यान्वयन गरेको प्रधानमन्त्री दाहालले स्पष्ट पारे । प्रधानमन्त्री दाहालले नीति तथा कार्यक्रममा छुटेका केही विषयलाई बजेटले समेट्ने आश्वासन पनि दिए ।

नयाँ रेकर्डको साथ महानगरमा विद्यासुन्दर
काठमाडौं—काठमाडौं महानगरपालिकाको मतगणना अन्तिम चरणमा पुग्दा मेयरमा एमालेका उम्मेदवार विद्यासुन्दर शाक्यले नयाँ रेकर्ड बनाउने पक्का भएको छ ।
पछिल्लो मतगणनाको परिणाम अनुसार, शाक्य कांग्रेस उम्मेदवार राजुराज जोशीभन्दा करिब १८ हजार मतले अगाडि छन् । काठमाडौं महानगरपालिकाको १० हजार मत गन्न बाँकी रहँदा एमाले उम्मेदवार शाक्य विजयी भईसकेका छन् । तर पनि गणना भईरहेका छन् ।
तेस्रो स्थानमा पछ्याइरहेकी विवेकशील नेपाली दलकी रन्जु दर्शनाको मत २२ हजार ३०७ पुगेको छ । त्यस्तै साझा पार्टीका किशोर थापाले १७ हजार ४७३ मत पुर्याएका छन् भने माओवादी उम्मेदवार सर्वोत्तम डंगोलले ७३३५ मत पाएका छन् ।
१ लाख ८६ हजार ८३२ मत गनिसक्दा एमालेका शाक्यले ६१ हजार ४२८ मत पाएका छन् भने कांग्रेसका जोशीले ४३ हजार ४६१ मत पाएका छन् । शाक्यले अहिलेसम्मकै रेकर्ड तोड्दै आफ्नो वडाबाट दुई तिहाई भन्दा बढी मत प्राप्त गरेका छन् । शाक्यको २१ नम्बर वडाबाट कुल ३८ सय मत मध्ये उनले ३२ सय ८७ मत प्राप्त गरेका छन् । यो कुल मतको करीव ८७ प्रतिशत हो ।
काठमाडौं महानगरपालिकाको उपमेयरमा नेपाली कांग्रेसकी उम्मेदवार हरिप्रभा खड्गीको जित सुनिश्चित भइसकेको छ । १० हजार मत गन्न बाँकी हुँदा उनले एमाले समर्थित राप्रपाका उम्मेदवार राजाराम श्रेष्ठलाई २२ हजार भन्दा बढी मतान्तरले पछि पारेकी छन् ।

खड्गीले ५५ हजार ८४५ मत प्राप्त गरेकी छन् भने राजारामले ३३ हजार ९९ मत पाएका छन् । तेस्रो स्थानमा साझा पार्टीकी निरुपमा यादवले १० हजार ९४५ मत पाएकी छन् भने माओवादी उम्मेदवार सुशीला पौडेलको ९६७२ मत छ ।

© २०१६, सर्वाधिकार गोल्डेनखबर डट कममा सुरक्षित फोन नं: ०१-५१७२६५७इमेल: [email protected]