Radio Golden Live..

रेडपाण्डाको प्रजनन अवधिभर पर्यटक आवागमनमा रोक

इलाम । रेडपाण्डा पाइने इलाम र भारतको सीमा क्षेत्र सिंहलीला नेशनल पार्क तथा सन्दकपुर गाउँपालिकाको चोयाटार सामुदायिक वन उपभोक्ता समूहले रेडपाण्डाको प्रजनन समय भएको भन्दै सीमावर्ती पर्यटकीय क्षेत्रमा पर्यटक आवागमनमा प्रतिबन्ध लगाएको छ । 

पर्यटकको होहल्लाले रेडपाण्डाको प्रजनन र यौन प्रक्रियामा असर पुग्ने भन्दै रेडपाण्डा पाइने स्थानमा जुन १५ देखि सेप्टेम्बर १५ तारिख तीन महिनासम्मका लागि पर्यटक र स्थानीयवासीलाई वन क्षेत्रमा आवतजावत गर्न प्रतिबन्ध लगाएको हो । इलामको तुम्लिङदेखि पाँचथरको फालोटसम्मको नेशनल पार्क क्षेत्र र चोयाटार सामुदायिक वनभित्रको पदमार्गमा पर्यटक हिँडडुलमा प्रतिबन्ध लगाएको माईजोगमाई–२ स्थित तुम्लिङका होटल व्यवसायी तिलक गुरुङले बताए । कञ्चनजङ्घा बेसक्याम्प जान भारतले सीमा क्षेत्रमा पशुपतिनगरको मानेभञ्ज्याङदेखि पर्यटन पदमार्ग निर्माण गरेको छ । पर्यटन पदमार्ग भएर सीमा क्षेत्रका नेपाली पर्यटकीयस्थलमा ट्रेकिङमा भारतलगायत तेस्रो मुलुकका सयौँ पर्यटक आवतजावत गर्दै आएका छन । दुर्लभ रेडपाण्डालगायत विश्वमा लोपोन्मुख वन्यजन्तु र चराचुरुङ्गीको यो समय प्रजनन र यौन क्रियाकलापको समय भएकाले मानवीय क्रियाकलापमा प्रतिबन्ध लगाएको नेशनल पार्कले जनाएको छ । पार्कले सूचना टाँस गरी तुम्लिङ–फालोट क्षेत्रको ४२ किलोमिटरमा स्वदेशी तथा विदेशी पर्यटक आवतजावत नगर्न अनुरोध गरेको छ । त्यस्तैगरी सन्दकपुर गाउँपालिकाको चोयाटार सामुदायिक वनमा पनि रेडपाण्डा पाइने भएकाले उक्त वन क्षेत्रमा पनि तीन महिनाका लागि आवतजावत बन्द गरिएको वन उपभोक्ता समूहका अध्यक्ष मानबहादुर तिवारीले जनाए । पर्यटकीयस्थल मानेभञ्ज्याङ, चित्रे, मेघमा, तुम्लिङ, जौवारी, गैरिवास, कैँयाकट्टा, कालपोखरी, बिखेभञ्ज्याङ र सन्दकपुर क्षेत्रमा सयौँ पर्यटक आउने गरेका छन् । 

© २०१६, सर्वाधिकार गोल्डेनखबर डट कममा सुरक्षित फोन नं: ०१-५१७२६५७इमेल: [email protected]