Radio Golden Live..

माओवादी केन्द्रको विस्तारित बैठकको निष्कर्ष ः कमजोर संगठन


काठमाडौं– नेकपा माओवादी केन्द्रको केन्द्रीय सचिवालयको विस्तारित बैठकमा बोल्ने अधिकांश नेताहरुले स्थानीय तहका पराजय बेहोर्नुको कारण नै संगठन कमजोर भएको बताएका छन् ।
सोमबारबाट माओवादी मुख्यलयामा सुरु भएको विस्तारित बैठकमा बोल्ने अधिकांश प्रदेश इन्चार्जले पार्टीले केन्द्रमा संगठन ठूलो भए पनि आधारभूत तहसम्म विस्तार गर्न नसक्दा स्थानीय तहको निर्वाचनमा लज्जास्पद हार भएको बताए ।
बैठकमा नेताहरुले सरकारको नेतृत्वमा रहेर सम्पादन गरिएका जनपक्षीय कामको व्यापक प्रचारप्रसार हुन नसक्दा स्थानीय तहको निर्वाचनमा पार्टीले अपेक्षानुसार विजय हासिल गर्न नसकिएको बताएका छन् ।
बैठकको सुरुमै बोलेका अध्यक्ष पुष्पकमल दाहालले पार्टीले बोकेका मुद्दाहरूले जिते पनि त्यसलाई मतमा रूपान्तरण गर्न नसकिएको बताएका थिए । त्यस्तै पार्टी सामाजिकीकरणमा चुकेको र जनताको बीचमा गएर काम गर्ने परिपाटी कम हुदै गएको भन्दै उनले चिन्ता व्यक्त गरे ।
त्यस्तै उनले पार्टीभित्र गुटबन्दी मौलाउँदै गएकोतर्फ सचेत गराउँदै कि गुटबन्दीको अन्त्य हुनुपर्ने कि खुलेरै गुटबन्दी गर्नुपर्ने बताएका थिए । ‘कि गुटबन्दी अन्त्य गरौँ, कि आजबाट सबैले खुलेरै गुटबन्दी गर्न थालौँ,’ अध्यक्ष दाहालले खुलेरै भने ।

अध्यक्ष दाहालले हारमा पार्टीको आन्तरिक कारणले जिम्मेवार ठानेलगत्तै प्रदेश इन्चार्जहरुले भने आ–आफ्नो प्रदेशको चुनावी समीक्षा रिपोर्टिङ सुनाएका थिए । जसमा धेरै जसो प्रदेश इन्चार्जले कमजोर संगठन, भएका एजेन्डाको पनि प्रचार प्रसार नहुनु तथा आर्थिक परिचालनमा कमीबाहेक कांग्रेस–एमालले गरेको धाँधलीलाई चुनाव हारको जिम्मेवार रहेको बताएका छन् ।
सोमबारको बैठकमा प्रदेश नम्बर १ का संयोजक काङ्खलेले एजेन्डा भए पनि पैसाको अभाव, तालमेल परिणामुखी नभएको र चार हजारको केन्द्रीय सदस्यको सट्टा राम्रो र चुस्त पार्टी कमिटी बनाउनुपर्ने बताए ।

२ नम्बर प्रदेशका मात्रिका यादवले माओवादी एकताबद्ध हुने हो भने माओवादीले ५० सिट जित्ने, पार्टी एकतापछि मधेसमा संगठन र जनआधार राम्रो भएको र पहाडमा भोट नआउनुको कारण पनि मण्डले राष्ट्रवाद भएको बताए । प्रदेश नम्बर ३ का हितमान शाक्यले काठमाडौंमा लोडेसडिङको मुद्दा जनताका पु¥याउन नसकेको, र ०७० को चुनावमा बहिस्कारतिर लाग्दा पनि संगठन चुस्त गर्न नसकिएको बताए ।

५ प्रदेश नम्वरका शक्ति बस्नेतले पार्टीको विभाजनको असरकै कारणले हार बेहोर्नुपरेको बताएका थिए भने ७ नम्बर प्रदेशका लेखराज भट्टले बैशाखको चुनाव सरेपछि चुनाव खर्चिलो र कार्यकर्ता परिचालन गर्न गाह्रो भएको बताएका छन् उनले एमाले नेता भीम रावलले आफूलाई सरकार प्रमुखका रुपमा पेस गर्दा पनि कर्मचारी, प्रहरी र प्रशासनबाट पनि बदमासी हुदा हार बेहोर्नुपरेको बताए ।

बैठक बोल्ने अधिकांश वक्ताले कमजोर संगठनलाई हारको कारण औँल्याए पनि ४ नम्बर प्रदेश संयोजक देव गुरुङले भने निर्वाचन प्रणाली नै गलत भएको बताउँदै यस्तो निर्वाचन प्रणालीले परम्परावादी संसदीय शक्ति नै विजयी हुने निष्कर्ष निकालेका छन

© २०१६, सर्वाधिकार गोल्डेनखबर डट कममा सुरक्षित फोन नं: ०१-५१७२६५७इमेल: [email protected]