वैशाख अन्तिम साता स्थानीय निर्वाचन

प्रधानमन्त्री पुष्पकमल दाहाल ‘प्रचण्ड’ले यही माघ १५ गतेभित्र निर्वाचनसम्बन्धी आवश्यक विधेयक संसदबाट पारित गराइ आगामी वैशाखको अन्तिम साता स्थानीय तहको निर्वाचन हुने जानकारी गराएका छन् ।
संसदीय मामिला पत्रकार समाजले प्रकाशन गरेको ‘संसदीय पत्रकारिता’ पुस्तकको विमोचन समारोहमा प्रधानमन्त्री दाहालले अनि निर्वाचनको मिति घोषणा गर्ने बताए ।
उनले छिटोमा वैशाख २५ गते र ढिलोमा वैशाख ३० गते सुरु गरी जेठकोे दोस्रो सातासम्म निर्वाचन सम्पन्न हुने गरी प्रमुख दलहरुबीच सहमति भएको बताए । संविधान जारी गर्ने बेलामा नै असन्तुष्ट दललाई सहमतिमा ल्याउन प्रमुख तीन दलबीच संविधान संशोधन गर्ने सहमति भएकाले सोही दिशामा सरकारले संशोधनमार्फत संविधानको स्वीकार्यता फराकिलो बनाउन सुरु गरेको बताए ।
प्रधानमन्त्री दाहालले संशोधनको प्रक्रिया अघि बढाएर असन्तुष्ट दललाई पनि निर्वाचनमा आउने वातावरण बनाउन सरकारको ध्यान केन्द्रित रहेको बताए ।