भरतपुरमा पुनः मतदान रोक्का आदेश मंगलबारसम्म कायम

काठमाडौं—चितवनको भरतपुर महानगरपालिकाको वडा नं १९ मा पुनःमतदान गराउने निर्वाचन आयोगको निर्णय तत्काल कार्यान्वयन नगर्न सर्वोच्च अदालतले दिएको अन्तरिम आदेश मंगलबारसम्म कायम हुने भएको छ ।
न्यायाधीश विशम्वरप्रसाद श्रेष्ठ र प्रकाशमानसिंह राउतको संयुक्त इजलासमा आइतबार पेसी तोकिएकामा हेर्न नभ्याइने भएपछि मंगलबार हेर्ने तय भएको सर्वोच्च अदालतका सहप्रवक्ता महेन्द्रप्रसाद उपाध्यायले जनाए ।
न्यायाधीश चोलेन्द्रशम्शेर जबराको एकल इजलासले यही जेठ २२ गते भरतपुर महानगरपालिकाको वडा नं १९ मा आइतबारसम्मका लागि आयोगको निर्णय कार्यान्वयन नगर्न अन्तरिम आदेश जारी गरेको थियो ।
आयोगले यही जेठ २० गते सो वडामा पुनःमतदान गराउने निर्णय गरेको थियो । त्यसलाई कार्यान्वयन नगर्न आदेश जारी गर्दै सर्वोच्च अदालतले विपक्षी आयोगलाई समेत छलफलमा बोलाएको थियो । सो वडाका खुला सदस्यका उम्मेदवार गुन्जमान विक र अधिवक्ता तुल्सीराम पाण्डेले आयोगको पुनःमतदान गराउने निर्णय बदर गर्न माग गर्दै यही जेठ २१ गते रिट निवेदन दायर गरेका थिए । निवेदनमा ९० मतलाई बदर मतको सूचीमा राखी गणना कार्य गर्न÷गराउन र पुनःमतदान गर्ने निर्णय बदर गर्न÷गराउन माग गरिएको थियो ।
तर नेकपा माओवादी(केन्द्र) र नेपाली कांगेरसले पुनःमतदानको माग गर्दै आएको थियो भने नेकपा एमालेले पुनःमतगणना गर्न सुझाएको थियो ।